KM3: Maniwala ka

Tinig. Tinig ang magsisimula ng isang dagitab, dagitab na magpapasilakbo sa mga damdamin at lilikha ng apoy sa puso ng ilang. Apoy na susunog sa balat, sa ulirat, at lalamon sa diwa. Apoy na minsan nang kumain sa utak at bumuhay sa rebolusyon noon pang araw, na nagpaagos ng dugo at nakipaglaban para sa tinawag nitong kalayaan. Apoy na pagsisimulan ng pagbabago...

Pagbabagong hindi makakamit ng tinig lamang.

Tinig na walang ibang gagawin kundi maglahad, sumigaw, magsulat, at magpahayag. At sa isang lipunang nilamon na ng pulitika, pera, kapangyarihan at komersyalismo, ang tinig ay mananatiling tinig.

Nailahad.

Naikwento.

Nasabi.

Ngunit parang isang sigaw, ito ay babalik sa’yo bilang isang alingawngaw.

Alingawngaw ng sigaw, ng tinig, ng nailahad.

Babalik sa’yo na hindi man lamang nagbago: isang tunog pa din, katulad noong ito ay naibulalas mo.

Ang tinig ay hindi dapat manatiling tinig lamang. Mula dito’y dapat magbunga ang isang rebolusyon, hindi tulad noong araw nang sa dugo, kundi ng aksyon.

At ang pulutong ng tao ay dapat magtila isa, na kapag narinig ang tinig ay dadaluyan ng dugo upang magkusa. Magkusang gumawa, umaksyon, gumalaw, ayon sa nararapat.

Urong, Pilipinas. Umurong ka’t umayos, umiwas sa dating gawi. Natunaw na ang mga reklamo sa tainga ng mga dapat ay nakikinig dito. Umurong ka’t makita na hindi lamang sapat ang umasa sa kanila, na nariyan ka, sa iyong sarili, upang magkusa, upang gumawa, upang gisingin ang lahi na nagtayo ng sarili mula pa noong una.

Sulong, Pilipinas. Pagkatapos umurong ay humakbang ka pasulong. Pasulong at hindi paatras, hindi pabalik sa lumang ikaw. Gisingin ang iyong dugo sa pamamagitan ng apoy ng tinig, at isa-isang gisingin ang iba mula sa pagkakahimbing --- pagkakahimbing sa paggawa. Sumulong ka’t akitin ang iba upang gumalaw, makisayaw, sumali sa saliw ng awit na likha ng apoy ng pagnanasang maging mas maayos na bansa.

Lumakad ka ng tuluyan, Pilipinas. Tapos na ang pagtayo at pagsigaw. Humayo ka’t pairalin sa sarili ang ninais mong mangyari. Hindi mo kailangan ng bayani, dahil ang bayani ay ikaw.

Oo, ikaw, sa iyong sarili, ang bayani.